Firring var stofnuð 1998. Ástæða þess var fyrst og fremst sú að eftir að tómstundaráð Hafnarfjarðar hafði sleppt silungaseiðum í Hvaleyrarvatn kom mikið hitaskeið og vatnið grynnkaði töluvert.

Við þessar aðstæður hitnaði vatnið , seiðin urðu máttlaus og voru upp í yfirborðinu. Urðu þau auðveld bráð Sílamávs sem kom í hundraða vís til þess að éta. Þar sem ég var mikið í skotveiði var haft samband við mig og Í samráði við mig var ákveðið að halda fuglinum frá vatninu til að vernda fiskinn og var það gert með því að skjóta á fuglinn.

Þetta verkefni tókst mjög vel og voru skotnir yfir 500 fuglar seinni hluta sumars eða þar til fuglinn fór af landi brott. Rétt þótti að það væri fyrirtæki en ekki einstaklingur sem sæi um verkið og var því Firring stofnuð.

Í framhaldi af þessu kom ég með þá tillögu um að veita köldu vatni úr kaldavatnsæð frá Kaldárseli í vatnið til þess að viðhalda vatnshæð og kæla vatnið.

Ástæða fyrir nafni Firringar er tvíþætt, annarsvegar þótti það alger Firring að fara út í þennan rekstur og hinsvegar er merkingin sú að firra einhvern einhvers.

Ég fór á námskeið hjá Hollustuvernd í meindýravörnum 1998 og öðlaðist þar með starfsréttindi meindýraeyðis og leifi til þess að nota eiturefni til eyðingar á meindýrum.

Árið 2001 var Firringu breytt í einkahlutafélag þar sem reksturinn var farinn að vinda töluvert mikið upp á sig. Í framhaldi af því fór ég á tveggja vikna námskeið hjá BRITISH PEST CONTROL ASSOCIATION og lauk þar prófi BPC DIPLOMA PART I.

Í mars 2009 lauk ég námskeiði frá BPCA í: successful bed bug control, eða nýjustu aðferðunum í baráttunni gegn veggjalús.

Í október 2009 fór starfsmaður Firringar til Ítalíu að nema nýa tækni í meindýraeyðingu. Þessi tækni kallast criopest og fyrirtækið sem fann upp þessa aðferð heitir Eco-trade. Hún fellst í því að úða köfnunarefni í stað eiturs á þá staði sem talið er að meindýr haldi sig. Köfnunarefnið úði/vökvi er -120°C þegar það fer út um stútinn og úðast yfir þann flöt sem meðhöndlaður er, köfnunarefnið er þyngra en andrúmsloft, sígur því niður í sprungur og rifur , frystir bæði egg og skordýr. Einnig er hægt að meðhöndla húsgögn með sama tækni.
Köfnunarefni er 100% þurrt og gasið myndar engan raka þegar það gufar upp, því er því hægt að nota það á rafmagnstæki í notkun og ekki þarf að rýma það svæði sem unnið er á.

Köfnunarefni, N2 er unnið úr andrúmslofti sem í grófum dráttum er 79% N2 og 20% súrefni O, rest eru ýmiskonar snefilefni. Í vökvaformi er N2 -196°C. Það er það algjörlega eiturfrítt og skemmir hvorki matvæli eða annað. Eftir meðferð þarf hvorki að rýma eða þrífa þau svæði sem meðhöndluð hafa verið.

Þessi aðferð hentar því vel í matvælavinnslum, veitingastöðum, bakaríum, hótelum og víðar þar sem röskun vegna meðferðarinnar er í lágmarki.Einnig þar sem fólk er hreinlega á mótieiturefnum.

Þessi tækni er sérstaklega hönnuð gegn veggjalús og kakkalökkum þar sem hægt er að frysta rúm / húsgögn og sprengja eggin sem oft eru inn í þeim þar sem köfnunarefnið sígur inn í gegn um efnið og frystir, án þess að skemma nokkuð annað sem inni er.

Ísaga ehf Breiðhöfða 11 framleiðir súr og köfnunarefni úr andrúmslofti og geta vélfræðingar verksmiðjunar eflaust svarað öllum spurningum sem upp koma vegna þessa.

Firring ehf þjónustar nú u.þ.b. 70 fyrirtæki með langt á annað hundrað starfsstaði í mjög fjölbreyttum rekstri auk þess að sjá um grenjavinnslu, minkaveiði sem og vargfuglaeyðingu fyrir sveitafélög. Félagi minn í refa og minkaveiði Jón Heiðar Jónsson frá Skagaströnd er með minkaveiðihundana okkar og sér um eldi og þjálfun þeirra. Einnig erum við með vel þjálfaða labradortík sem ekki er hægt að vera án þegar átt er við vargfugl.

Þegar talað er um vargfugla er ekki aðeins átt við máva eða hrafna, heldur líka gæsir sem valda skemmdum á golfvöllum, kornökrum sem og að valda mikilli slysahættu á fótboltavöllum. Líka má nefna dúfur sem eru miklir smitberar sjúkdóma. Starar eru friðaðir, en þegar þeir eru komnir inn í hús með hreiður og jafnvel flóafaraldur lít ég svo á að sama gildi um þá og mýs, sem eru friðaðar í náttúrunni en heimilt að farga innanhúss.

Villikettir eru víða til vandræða og hefur Firring ehf mikla reynslu í föngun og förgun þeirra.

Kanínur geta valdið gríðarlegum skemmdum á gróðri þar sem þær ná að fjölga sér og hefur Firring ehf séð um að eyða og halda þeim í skefjum á mörgum stöðum.

Fyrir utan námskeið í meindýravörnum hef ég starfsréttindi VFI þ.e.a.s. vélfræðingur (18 ár sem vélstjóri) þá hef ég lokið námskeiði frá Nýsköpunarmiðstöð Íslands í umsjón fasteigna sem og námskeiði í garðaúðun.